ભૂતપ્રેત એવી બાબત છે જેના પર કેટલાંક લોકો વિશ્વાસ કરે છે તો કેટલાંક તેને અંધવિશ્વાસમાં ખપાવે છે, પરંતુ ખરી વાત તો એ છે કે જેના પર વીતે તે જ જાણે. દુનિયાભરમાં એવાં કેટલાંય સ્થળો છે જ્યાં ભૂતપ્રેતનો વાસ છે. આમાંથી એક ચીનની દીવાલ પણ છે. પ્રવાસીઓએ અહીં ભૂતાવળ ભટકતી હોવાનું જણાવ્યું છે ચીનની ગ્રેટ દીવાલ વિશ્વની સાત અજાયબીઓમાંથી એક છે. આ દીવાલનું બાંધકામ અનેક શાસકોના રાજમાં સદીઓ સુધી ચાલ્યું હતું. આ દીવાલની વિશાળતાનો અંદાજ એ બાબત પરથી જ આવી જાય કે, તેને અંતરીક્ષ સ્ટેશન પરથી પણ જોઈ શકાય છે. ક્યાંક એવા પણ દાવા થયા છે કે ચંદ્ર પરથી પણ ચીનની દીવાલને જોઈ શકાય છે. હશે! તે ક્યાંથી દેખાય છે કે ક્યાંથી નથી દેખાતી તે મહત્ત્વની વાત નથી, પરંતુ પૃથ્વી પર માનવ ર્નિિમત આ સૌથી લાંબી ને વિશાળ દીવાલ છે. ચીનની દીવાલના નિર્માણ દરમિયાન લાખો મજૂરો તથા સૈનિકોનાં મૃત્યુ પોતાનાં ઘરોથી હજારો માઈલ દૂર આ દીવાલની આસપાસ થયેલી દુર્ઘટનાઓમાં થયાં હતાં. હજારો વર્ષોમાં લાખો લોકો કમોતે મર્યા હોવાથી તેઓ ભૂત થયા છે. ચીનની દીવાલ ફરવા આવેલા અનેક પ્રવાસીઓને વિચિત્ર અનુભૂતિઓ થઈ હોવાનું તેઓ જણાવે છે. જેમ કે, ધૂંધળી આકૃતિઓ દેખાવી, અચાનક કોઈ અદૃશ્ય શક્તિ પોતાને જકડી રહી હોય તેવું લાગવું. કેટલાંક પ્રવાસીઓએ તો એટલે સુધી કહ્યું છે કે કોઈ અદૃશ્ય શક્તિએ તેમને થપ્પડ પણ મારી છે. વર્ષોથી અનેક પ્રવાસીઓના આવા અનુભવોને કારણે ધી ડેસ્ટિનેશન ટ્રૂથ નામની એક સંસ્થાએ ચીનની ગ્રેટ દીવાલ સાથે સંબંધિત રહસ્યમયી ઘટનાઓ વિશે સર્વેક્ષણ કર્યું. બીજિંગની ઉત્તર તરફ સ્થિત દીવાલના ભાગને 'વાઇલ્ડ વોલ' તરીકે ઓળખવામાં આવે છે તથા આ એ જ ભાગ છે જેને ભૂતાવળનું ક્ષેત્ર માનવામાં આવે છે. પોતાના સર્વેક્ષણ દરમિયાન આ સંસ્થાના સદસ્યોને રાત્રિના સમયે વાઇલ્ડ વોલની આસપાસ વર્ષોથી ઉજ્જડ પડેલા સૈનિક બેરેકમાંથી કેમ્પફાયરના ધુમાડા નીકળતા જોયા, પરંતુ ત્યાં કોઈ હતું જ નહીં. ત્યાં તેજ પ્રકાશના બે ગોળા પણ જોવા મળ્યા. કોઈના ચાલવાનાં પગલાંનો અવાજ પણ સાંભળવા મળ્યો. જોકે, તેમણે દાવો કર્યો કે ત્યાં તેમના સિવાય કોઈ જ નહોતું. આ જ ટીમના એક સભ્ય જોશ ગેટ્સને કોઈએ તેમને જકડી રાખ્યા હોય તેવો અનુભવ થયો તથા તેમની પીઠ પર લટકાવેલી બેગનું બટન ખોલીને તેમનો સામાન કોઈ ખરાબ રીતે ઊથલપાથલ કરીને જોઈ રહ્યું હોય તેવું લાગ્યું. ત્યારબાદ બેગ જમીન પર મૂકીને બધાએ જોયું તો તેમણે ગોઠવેલો બધો જ સામાન અસ્તવ્યસ્ત થઈ ગયેલો હતો. બેગની અંદરના એક ખાનાની વસ્તુ બીજા ખાનામાં મળી હતી, જ્યારે તે તો બંધ જ હતી. આમ, ગ્રેટ વોલ ઓફ ચાઇનાના વાઇલ્ડ વોલ ભાગમાં ભૂત હોવાની લોકોની વાત સાચી જણાઈ. જોકે, ચીનની દીવાલના ભૂતોએ ક્યારેય કોઈને મોટું નુકસાન પહોંચાડયું હોય કે મોત આપ્યું હોય તેવું ક્યારેય બન્યું નથી.